Adalar hər zaman turistlərin ən çox maraq göstərdiyi məkanlar sırasında olub. Bunlar müstəqil ada dövlətləri, məşhur kurort arxipelaqları və ya cəmi bir neçə saatlıq səfər üçün uyğun olan kiçik torpaq sahələri ola bilər.

Qaynarinfo xəbər verir ki, səyahətçilər adalarda tənhalıq, sakitlik və bənzərsiz təbiət axtarırlar. Bununla yanaşı, bu ərazilərdə nəqliyyat əlçatanlığı və zəruri malların təchizatı kimi çətinliklər də mövcuddur.

Dünyanın aparıcı səyahət nəşrlərindən biri olan "Lonely Planet” Avropada yalnız qayıqla getmək mümkün olan beş möhtəşəm kiçik adanı təqdim edib.

İspaniya – Tabarka adası

Aralıq dənizinin ən kiçik məskunlaşmış adası hesab edilən Tabarka İspaniyanın Kosta-Blanka sahillərini ziyarət edən turistlər üçün ideal birgünlük səyahət məkanıdır.

Ada sahildən 5 kilometrdən az məsafədə yerləşən dəniz qoruğunun ərazisindədir. Burada turistlər Playa de Tabarca çimərliyində və ya XVIII əsrdə pirat hücumlarına məruz qalmış Nova Tabarca şəhərinin qala divarları yaxınlığındakı kiçik körfəzlərdə dənizin təmiz sularından zövq ala bilərlər. Adanın digər hissəsində isə mayaklar, qayalı sahillər və müşahidə meydançalarına aparan piyada marşrutları yerləşir.

Necə getmək olar?

Alikante limanından bərə ilə adaya təxminən bir saata çatmaq mümkündür. Sant Pola del Este qəsəbəsindən isə sürətli katerlə səfər cəmi 25 dəqiqə çəkir.

İrlandiya – Cape Clear adası

Qum saatını xatırladan formaya malik bu ada İrlandiya dilinin gündəlik istifadə olunduğu nadir yaşayış məntəqələrindən biridir.

Yay aylarında turistlər burada çimərliklərdə dincəlir, adanı əhatə edən yürüş marşrutları ilə gəzir və Fastnet mayakına açılan mənzərələri seyr edirlər. Bərə ilə səfər zamanı delfinlərlə qarşılaşmaq da mümkündür.

Necə getmək olar?

Cape Clear Ferries bərələri ilboyu Baltimore limanından hərəkət edir. Səfər təxminən bir saat davam edir.

İtaliya – Levanzo adası

Siciliyanın qərbində yerləşən Eqad arxipelaqının ən kiçik adası olan Levanzo piyada marşrutları və mənzərəli körfəzləri ilə seçilir.

Turistlər burada meşə cığırları ilə qayalıqlara qalxa və ya limandan mavi çalarlı suları ilə məşhur Cala Minniola körfəzinə piyada gedə bilərlər. Adanın ən maraqlı məkanlarından biri 12 mindən çox yaşı olduğu bildirilən qayaüstü rəsmlərin qorunduğu Grotta del Genovese mağarasıdır. Ekskursiyalar məhdud sayda təşkil olunduğundan biletləri ən azı 48 saat əvvəl sifariş etmək tövsiyə olunur.

Necə getmək olar?

"Liberty Lines" şirkətinin sürətli katerləri Trapani limanından Favinyana, Marettimo və Levanzo adalarına müntəzəm reyslər həyata keçirir.

İspaniya – İslas Sies adaları

Qalisiya sahillərində yerləşən bu adalar Atlantik adaları milli parkının tərkib hissəsidir.

İlya de San Martino adasına yalnız kayak və ya şəxsi qayıqla çatmaq mümkündür. İlya Monteagudo və İlya Faro adaları isə körpü ilə birləşdirilib. İspaniyanın ən məşhur ağ qumlu çimərliklərindən biri hesab edilən Praia de Rodas da burada yerləşir.

Necə getmək olar?

Mar de Ons bərəsi ilə Viqo şəhərindən əsas adaya təxminən 45 dəqiqəyə çatmaq mümkündür. Səfərdən əvvəl milli parkın rəsmi saytından pulsuz giriş icazəsi almaq tələb olunur.

Yunanıstan – Telendos adası

Dodekanes arxipelaqına daxil olan Telendos təxminən 1 500 il əvvəl baş vermiş güclü zəlzələ nəticəsində Kalimnos adasından ayrılıb.

Hazırda adada avtomobil yoxdur. Kiçik balıqçı kəndi, qayaya dırmanma marşrutları və su altında qalmış qədim Pota şəhərinin qalıqları buranı turistlər üçün cəlbedici edir. Piyada yürüş həvəskarları isə Müqəddəs Konstantin kilsəsinə qədər uzanan 10 kilometrlik marşrut boyunca möhtəşəm günbatımını izləyə bilərlər.

Necə getmək olar?

Kalimnos adasının Myrties limanından hər 30 dəqiqədən bir hərəkət edən su taksiləri ilə Telendosa təxminən 10 dəqiqəyə çatmaq mümkündür. Bir istiqamət üzrə gediş haqqı 3 avrodur.

Aydın